लंडन, दि. 3 (वृत्तसंस्था) : पाकिस्तानी खेळाडूंवर असलेल्या "स्पॉट फिक्सिंग'च्या आरोपांमुळे क्रिकेटची प्रतिष्ठा धोक्यात आली असताना ती टिकवण्यासाठी आयसीसीने सलमान बट्ट, मोहम्मद असिफ व मोहम्मद आमेर यांना तात्पुरते निलंबित करण्याची अभूतपूर्व कारवाई केली आहे. अँटी करप्शन कोडनुसार आयसीसीने खेळाडूंना निलंबित करण्याची कारवाई क्रिकेटच्या इतिहासात प्रथमच घडत आहे.

सौरव गांगुलीचे मत कोलकाता, दि. 3 (वृत्तसंस्था) : भारताचे युवा क्रिकेटपटू अपेक्षापूर्ती करायला कमी पडत आहेत. त्यामुळे सचिन तेंडुलकरसारख्या बड्या खेळाडूंच्या निवृत्तीनंतरच टीम इंडियाचा कर्णधार महेंद्रसिंग धोनीपुढे खरे आव्हान उभे राहील, असे मत भारतीय क्रिकेट संघाचा माजी कर्णधार सौरव गांगुलीने व्यक्त केले.

नवी दिल्ली, दि. 3 (वृत्तसंस्था) : आपल्या सर्वांचा लाडका मास्टर ब्लास्टर फलंदाज सचिन तेंडुलकर शुक्रवारी भारतीय वायुसेनेचा सन्माननीय ग्रुप कॅप्टन बनला. वायुसेनेचे प्रमुख एअर चीफ मार्शल पी. व्ही. नाईक यांनी नवी दिल्लीत झालेल्या एका शानदार समारंभात सचिनला ही रॅंक बहाल केली. सचिनला सन्माननीय ग्रुप कॅप्टन ही रॅंक देण्याची घोषणा राष्ट्रपती श्रीमती प्रतिभाताई पाटील यांनी 23 जूनला केली होती.

लंडन, दि. 3 (वृत्तसंस्था) : स्टेडियमच्या बांधकामातील दिरंगाई व भ्रष्टाचाराच्या आरोपांमुळे चक्रव्युहात अडकलेल्या राष्ट्रकुल स्पर्धा संयोजन समितीला बड्या खेळाडूंच्या माघारीचा फटका बसत आहे. आता केनियाचा 800 मीटर शर्यतीतील विश्वविक्रमवीर डेव्हिड रुडिशा व लांब पल्ल्याच्या शर्यतीतील युरोपियन विजेता मोहम्मद फराह यांनी आगामी राष्ट्रकुल स्पर्धांमधून माघार घेतली आहे.

नवी दिल्ली, दि. 3 (वृत्तसंस्था) : क्रिकेटचा खेळच संकटात टाकणाऱ्या "स्पॉट फिक्सिंग' प्रकरणाची आयसीसीने मुळापासून चौकशी करावी आणि दोषी खेळाडूंवर कठोर कारवाई करावी, अशी मागणी मास्टर ब्लास्टर सचिन तेंडुलकरने केली आहे. दरम्यान, आपल्या 21 वर्षांच्या कारकिर्दीत एकाही भारतीय क्रिकेटपटूला बुकींनी आपल्या जाळ्यात ओढण्याचा प्रयत्न केल्याचे ऐकिवात नाही, असे त्याने सांगितले.

कराची, दि. 3 (वृत्तसंस्था) : स्पॉट फिक्सिंगचे आरोप असलेल्या सलमान बट्ट, मोहम्मद असिफ व मोहम्मद आमेर यांना वगळल्यानंतर पाकिस्तानच्या एकदिवसीय संघात असद शफिक व मोहम्मद इरफान या दोन नव्या चेहऱ्यांना संधी देण्यात आली आहे. सध्या हे दोघे श्रीलंकेत पाकिस्तान "अ' संघाकडून खेळत असून ते वनडे मालिकेसाठी इंग्लंडला रवाना होतील. 24 वर्षीय शफिक आशिया चषक स्पर्धेत पाककडून बांगलादेशविरुध्द एकच वनडे सामना खेळला होता. त्यात त्याने फक्त 17 धावा केल्या होत्या.

वाई, दि. 3 : राज्य शरीरसौष्ठव असोसिएशनच्यावतीने रविवार, दि. 5 रोजी वाईमध्ये प्रथमच "मिस्टर एशिया' व "मिस्टर युनिव्हर्स' साठी निवड चाचणी स्पर्धा होणार आहे. या स्पर्धेची जय्यत तयारी सुरू आहे. सेनादल व रेल्वे संघांसह देशातील 35 राज्यांचे दीडशे निमंत्रित शरीरसौष्ठवपटू स्पर्धेत सहभागी होणार आहेत. या खेळाडूंचे कौशल्य पाहण्याची संधी जिल्ह्यातील क्रीडा रसिकांना मिळणार असल्याची माहिती असोसिएशनचे सरचिटणीस संजय मोरे यांनी दिली.

नवी दिल्ली, दि. 2 (वृत्तसंस्था) : मॅच फिक्सिंगच्या आरोपांमुळे बीसीसीआयने आजन्म बंदी लादलेला भारताचा माजी कर्णधार मोहम्मद अझरुद्दीनने पाक खेळाडूंवर झालेल्या "स्पॉट फिक्सिंग'च्या आरोपांमुळे उठलेल्या गदारोळात नाक खुपसले आहे. पाक खेळाडूंवर हे आरोप अजून सिध्द झालेले नाहीत. त्यामुळे त्यांना दोषी धरता येणार नाही, असे मत त्याने व्यक्त केले. तो म्हणाला, सध्या हे प्रकरण फक्त आरोपांच्या टप्प्यात आहे.

मेलबर्न, 2 (वृत्तसंस्था) : ऑस्ट्रेलियाचा माजी लेगस्पिनर शेन वॉर्न व इंग्लंडचे माजी प्रशिक्षक डंकन फ्लेचर यांनी स्पॉट फिक्सिंगप्रकरणी सलमान बट्ट, मोहम्मद असिफ व मोहम्मद आमेर हे दोषी आढळल्यास यांच्यावर आजन्म बंदी घालण्याची मागणी केली आहे. 1994 साली बुकीला माहिती दिल्याबद्दल दंडाची शिक्षा झालेला वॉर्न म्हणाला,हे खरे असेल आणि हे तिघे स्पॉट फिक्सिंग, सामना गमावणे व नोबॉल टाकणे यामध्ये दोषी आढळले तर त्यांना बाहेर फेकलेले चांगले. इतकी ही साधी गोष्ट आहे.

वाई, दि. 2 ः येथील किसन वीर महाविद्यालयातील खेळाडूंनी नुकत्याच झालेल्या शिवाजी विद्यापीठ क्रॉस कंट्री स्पर्धेत उज्ज्वल यश मिळवले. पुरुष गटात कालिदास हिरवे याने 12.5 किमी अंतर 41 मिनिटांत पूर्ण करुन दुसरा क्रमांक मिळविला. नैनिताल येथे होणाऱ्या आंतरविद्यापीठ स्पर्धेसाठी त्याची शिवाजी विद्यापीठ संघात निवड झाली आहे. त्याने भोपाळ येथे झालेल्या राष्ट्रीय ऍथलेटिक्स स्पर्धेत प्रथम क्रमांक मिळविला होता.