Dainik Aikya - Published from Satara (Maharashtra,India) Published on,
 
Search Tag:     From Date:     To Date:     Section:    
Total Results: 74
जगातील सर्वात उंच स्मारक करण्याची मुख्यमंत्र्यांची ग्वाही 5नागपूर,दि.20 (प्रतिनिधी) : महाराष्ट्राचे आराध्यदैवत असणार्‍या छत्रपती शिवरायांच्या अरबी समुद्रातील प्रस्तावित स्मारकाची उंची कमी करण्याच्या मुद्द्यावरून शुक्रवारी पुन्हा विधानसभेत गदारोळ झाला. मूळ आराखड्यात बदल करून उंची कमी केल्याचा आरोप करत विरोधकांसह शिवसेनेनेही जोरदार आक्षेप घेतला. मात्र हे स्मारक जगातील सर्वात उंच असेल, अशी ग्वाही मुख्यमंत्री देवेंद्र फडणवीस यांनी दिली. केंद्राच्या पर्यावरण विभागाने शिवस्मारकाच्या आराखड्याला परवानगी देताना उंची 160 मीटरवरून 126 मीटर केली असल्याचा विषय विरोधी पक्षनेते राधाकृष्ण विखे-पाटील यांनी विधान-सभेत उपस्थित केला.    राष्ट्रवादीचे जयंत पाटील, शिवसेनेचे प्रताप सरनाईक आदींनी हा मुद्दा उचलून धरताना मूळ आराखड्यात बदल करण्यास विरोध दर्शवला. शिक्षणमंत्री विनोद तावडे यांनी विरोधक या विषयाचे राजकारण करत असल्याचा आरोप केल्याने सभागृहात गोंधळ होऊन तीन वेळा कामकाज तहकूब करावे लागले. त्यानंतर मुख्यमंत्री देवेंद्र फडणवीस यांनी याबाबत विस्तृत निवेदन करून वस्तुस्थिती स्पष्ट केली.
Saturday, July 21, 2018 AT 08:35 PM (IST)
मुख्यमंत्र्यांचे आश्‍वासन पंढरपूरला आंदोलन न करण्याचे आवाहन 5नागपूर, दि. 19 (प्रतिनिधी) : मराठा समाजाला आरक्षण देण्यासाठी राज्य शासनाची भूमिका सकारात्मक आहे. मागास वर्ग आयोगाच्या अहवालानंतर उच्च न्यायालयाच्या निर्देशानुसार याबाबत निर्णय घेतला जाईल, अशी ग्वाही देतानाच मराठा समाजाला आरक्षण मिळेपर्यंत सरकारच्या भरतीतील 16 टक्के पदे मराठा समाजासाठी राखीव ठेवण्यात येतील, असे आश्‍वासन मुख्यमंत्री देवेंद्र फडणवीस यांनी विधानसभेत दिली. त्याच वेळी पंढरपूर येथे आषाढी एकादशीला आंदोलन करून तेथे येणार्‍या लाखो भाविकांना त्रास होईल, असे कोणतेही कृत्य करू नये, असे आवाहनही त्यांनी केले. लाखोंचे मूक मोर्चे काढूनही मराठा आरक्षणाचा प्रश्‍न मार्गी लागत नसल्याने मराठा संघटनांनी उग्र आंदोलनाचा इशारा देताना आषाढी एकादशीला मुख्यमंत्र्यांना महापूजा करू देणार नाही, असा पवित्रा घेतला आहे. परळी येथे आंदोलनही सुरू केले आहे. त्याचे तीव्र पडसाद आज विधिमंडळात उमटले. विरोधी पक्षनेते राधाकृष्ण विखे-पाटील यांनी विधानसभेत स्थगन प्रस्तावाद्वारे हा विषय उपस्थित केला. मराठा आरक्षणाबाबत सरकार वेळकाढूपणा करत असल्याची भावना झाली आहे.
Friday, July 20, 2018 AT 08:28 PM (IST)
विधानसभेत राजदंड पळवला अतुल भातखळकरांचा माफीनामा 5नागपूर, दि. 17 (प्रतिनिधी) : छत्रपती शिवाजी महाराजांच्या अरबी समुद्रातील प्रस्तावित स्मारकामधील पुतळ्याची उंची कमी करण्याचा मुद्दा विरोधक उपस्थित करत असताना भाजप आमदार अतुल भातखळकर यांनी केलेल्या वादग्रस्त वक्तव्यामुळे मंगळवारी विधानसभेत प्रचंड गदारोळ झाला. भातखळकर यांच्या विधानामुळे संतप्त झालेल्या विरोधकांसह सत्ताधारी शिवसेनेच्या सदस्यांनीही त्यांच्या निलंबनाची मागणी केल्याने गदारोळ होऊन चार वेळा कामकाज तहकूब करावे लागले. अखेर आपले ‘ते’ शब्द मागे घेत भातखळकर  यांनी सभागृहाची आणि महाराष्ट्राची माफी मगितल्यानंतरच या गोंधळावर पडदा पडला. छत्रपती शिवरायांच्या पुतळ्याची उंची कमी केल्याचा विषय माजी मुख्यमंत्री पृथ्वीराज चव्हाण यांनी शून्य प्रहरात उपस्थित केला. अरबी समुद्रातील शिवस्मारक हा महाराष्ट्राच्या अस्मितेचा विषय असून सरकारने मूळ आराखड्यात बदल करून पुतळ्याची उंची कमी करून तलवारीची उंची वाढविली असल्याचा आरोप त्यांनी केला.
Wednesday, July 18, 2018 AT 08:28 PM (IST)
गृहकर्जासाठी सरकारी अनुदान : मुख्यमंत्री 5नागपूर, दि. 16 (प्रतिनिधी) : राज्यातील पोलीस वसाहतींच्या पुनर्विकासासाठी सध्या 20 हजार घरांचा आराखडा तयार करण्यात आला असून मोडकळीस आलेल्या घरांच्या ठिकाणी याची अंमलबजावणी पहिल्यांदा करण्यात येईल. पोलीस कर्मचार्‍यांना गृहकर्जासाठी 2018 कोटी रुपये देण्यात आले असून त्याचे व्याज राज्य शासन देईल, अशी घोषणा मुख्यमंत्री देवेंद्र फडणवीस यांनी आज विधानसभेत केली. शिवसेना आमदार सुनील शिंदे यांनी लक्षवेधीद्वारे आज पोलीस कर्मचार्‍यांच्या  वसाहतींमधील मोडकळीस आलेल्या इमारतींचा प्रश्‍न उपस्थित केला होता. राज्यातील पोलीस वसाहतींच्या पुनर्विकासासाठी सध्या 20 हजार घरांचा आराखडा तयार करण्यात आल्याचे मुख्यमंत्र्यांनी सांगितले. पोलिसांना गृहकर्ज देताना त्याचे व्याज शासन अदा करत आहे. पोलिसांना स्वत:चे घर बांधण्यासाठी राज्य शासनाने पुढाकार घेतला आहे. त्याचप्रमाणे पोलिसांच्या नियोजित गृहनिर्माण सोसायट्यांना स्वत:ची घरे बांधायची आहेत, त्यांना शहराजवळ जमीन आणि वाढीव चटई क्षेत्र देण्याचा निर्णय शासनाने घेतल्याची माहिती मुख्यमंत्र्यांनी दिली.
Tuesday, July 17, 2018 AT 08:30 PM (IST)
आंदोलनाची हिंसक सुरूवात 5अमरावती, दि. 15 (वृत्तसंस्था) : दूध दरवाढीच्या मुद्द्यावरून मुंबईचा दूध पुरवठा तोडण्याचा इशारा दिलेले स्वाभिमानी शेतकरी संघटनेचे कार्यकर्ते रविवारी आक्रमक झाले. या आंदोलनाची सुरूवातच हिंसक घटनेने झाली.    स्वाभिमानी शेतकरी संघटनेच्या कार्यकर्त्यांनी अमरावतीमध्ये दुधाचा टँकर अडवून त्याची तोडफोड केली. त्यानंतर चालकाला खाली उतरवून हा टँकर पेटवून देण्यात आला. त्यामुळे दुधाच्या टँकर्सना संरक्षण देऊ, असे आश्‍वासन देणारे दुग्धविकास मंत्री महादेव जानकर यांची कोंडी होण्याची शक्यता आहे. स्वाभिमानीचे खासदार राजू शेट्टी यांनी पत्रकार परिषद घेऊन तीव्र आंदोलनाचा इशारा दिला होता. दूध उत्पादकांना योग्य भाव मिळत नसल्याची प्रशासनाला जाणीव व्हावी यासाठी मुंबईचा दूध पुरवठा तोडण्याचा इशारा त्यांनी दिला होता. शेट्टींनी पंढरपुरातून आंदोलन सुरू करणार असल्याचे सांगितले होते. रविवारी मध्यरात्री श्री विठ्ठलाच्या मूर्तीस दुग्धाभिषेक करून या आंदोलनाची सुरूवात करण्यात येणार असल्याचे त्यांनी सांगितले होते. मात्र तत्पूर्वीच कार्यकर्ते आक्रमक झाल्याचे अमरावतीच्या घटनेवरून दिसून आले.
Monday, July 16, 2018 AT 09:08 PM (IST)
1 2 3 4 5 ...
 
© Copyrights 2010 Dainik Aikya.com - All rights reserved.
of
Powered By: