Dainik Aikya - Published from Satara (Maharashtra,India) Published on,
 
Search Tag:     From Date:     To Date:     Section:    
Total Results: 35
5मुंबई, दि. 21 (प्रतिनिधी) : बाजार हस्तक्षेप योजनेंतर्गत शेतकर्‍यांकडून खरेदी केलेल्या तुरीची भरडाई करून स्वस्त धान्य दुकानांमधून शिधापत्रिकांवर तूर डाळ विकण्याच्या प्रस्तावास आज मंत्रिमंडळ बैठकीत मंजुरी देण्यात आली. स्वस्त धान्य दुकानांमध्ये 55 रुपये किलो दराने तूर डाळ उपलब्ध होणार आहे. राज्यात 2015-16 च्या हंगामात तुरीचे मोठ्या प्रमाणात उत्पादन झाल्याने शेतकर्‍यांचे नुकसान होऊ नये यासाठी राज्य व केंद्र सरकारने वेगवेगळ्या योजनांतर्गत तुरीची हमीभावाने खरेदी केली होती. राज्य शासनाने स्वतःच्या निधीतून बाजार हस्तक्षेप योजनेंतर्गत 25 लाख 25 हजार क्विंटल तूर खरेदी केली आहे. या तुरीच्या भरडाईस राज्य शासनाने परवानगी दिली होती. भरडाई केलेली तूर डाळ स्वस्त धान्य दुकानांच्या माध्यमातून रास्त भावात विक्रीसाठी काढण्यास आज राज्य मंत्रिमंडाळाने मान्यता दिली. त्यानुसार ही तूर डाळ आता 55 रुपये किलो दराने शिधापत्रिकाधारकास मिळणार आहे.
Wednesday, November 22, 2017 AT 08:50 PM (IST)
5मुंबई, दि. 19 (वृत्तसंस्था) : सेन्सॉर बोर्डाने तांत्रिक कारणे दाखवून चित्रपट परत केल्यानंतर संजय लीला भन्साळी यांच्या वादग्रस्त पद्मावती चित्रपटाचे प्रदर्शन पुढे ढकलण्याचा निर्णय निर्मात्यांनी घेतला आहे. पद्मावती चित्रपट आधी 1 डिसेंबरला प्रदर्शित करण्यात येणार होता. आता चित्रपटाचे प्रदर्शन लांबणीवर पडले असून प्रदर्शनाची पुढची तारीख लवकरच ठरवण्यात येईल, असे ‘व्हायकॉम 18’ या निर्मिती संस्थेने स्पष्ट केले आहे. 15 व्या शतकात लिहिल्या गेलेल्या पद्मावत या काव्यावर पद्मावती हा चित्रपट आधारित आहे. राणी पद्मावतीच्या जोहारची पार्श्‍वभूमी या चित्रपटाला आहे. मात्र, काही दृश्यांमुळे हा चित्रपट वादग्रस्त ठरला आहे.  त्याविरुद्ध राजपूत करणी सेनेने उग्र आंदोलनाचा आणि चित्रपटातील अभिनेत्री दीपिका पदुकोणचे नाक कापण्याचा इशारा दिला होता. या संदर्भात हरियाणाच्या एका मंत्र्याने केंद्रीय प्रसारण मंत्री स्मृती इराणींना पत्रही लिहिले होते. गुजरात विधानसभा निवडणुकीच्या तोंडावर वाद नको म्हणून, या चित्रपटाचे प्रदर्शन पुढे ढकलल्याची चर्चा आहे. सेन्सॉर बोर्डाने या चित्रपटाला 63 दिवस परवानगी दिली नव्हती.
Monday, November 20, 2017 AT 08:54 PM (IST)
5मुंबई, दि. 17 (प्रतिनिधी) : येत्या दोन वर्षांत महाराष्ट्रातील साडेआठ लाख हेक्टर जमीन सिंचनाखाली आणण्याचा संकल्प आपण केला आहे. हे सरकार पाच वर्षांचा कार्यकाळ पूर्ण करेल, तेव्हा सिंचनाचे क्षेत्र मोठ्या प्रमाणात वाढलेले दिसेल, असा विश्‍वास जलसंपदा मंत्री गिरीश महाजन यांनी व्यक्त केला आहे. कालवा सल्लागार समितीची बैठक शुक्रवारी झाली. या बैठकीत राज्यातील 36 प्रकल्पांचा आढावा घेण्यात आला. त्यानंतर झालेल्या पत्रकार परिषदेत ते बोलत होते. अमरावती व नागपूर विभाग सोडला तर इतर विभागात समाधानकारक पाऊस झाला आहे. 15 ऑक्टोबरपर्यंत राज्यातील सर्व धरणांमध्ये मिळून 75 टक्के पाणीसाठा होता. हे पाणी शेतकर्‍यांना सिंचनासाठी मिळावे याबाबत बैठकीत चर्चा करण्यात आली. पिण्याचे पाणी व उद्योगांची गरज लक्षात घेता यावर्षीही 40 लाख हेक्टर प्रत्यक्ष सिंचनाचे लक्ष्य ठेवण्यात आले आहे. पुढील दोन वर्षांत अधिकची साडेआठ लाख हेक्टर जमीन सिंचनाखाली आणण्याचा संकल्प आहे, असे गिरीश महाजन म्हणाले. महाराष्ट्रासाठी सुवर्णयोग केंद्रात नितीन गडकरी यांच्याकडे जलसंपदा खाते आहे. महाराष्ट्रात देवेंद्र फडणवीस मुख्यमंत्री तर मी जलसंपदा मंत्री आहे.
Saturday, November 18, 2017 AT 08:53 PM (IST)
प्रहार संघटनेच्या आंदोलकांचे कृत्य 5सोलापूर, दि. 17 (वृत्तसंस्था) : उसाला योग्य दर मिळावा, या मागणीसाठी शुक्रवारी प्रहार संघटनेने सोलापूर जिल्ह्यात सहकार मंत्री सुभाष देशमुख यांच्या घरासमोर शुक्रवारी आक्रमक आंदोलन केले. संघटनेच्या कार्यकर्त्यांनी स्वत:च्या अंगावर रक्ताच्या बाटल्या फोडून सरकारचा निषेध केला. जनहित शेतकरी संघटनेने काही दिवसांपूर्वी सहकार मंत्र्यांच्या घरासमोर आंदोलन केले होते. त्यामुळे देशमुख यांच्या निवास्थानाच्या परिसरात कडेकोट पोलीस बंदोबस्त ठेवण्यात आला होता तरीही प्रहार संघटनेने सहकार मंत्र्यांच्या घरासमोर रक्तदान शिबिर घेऊन आंदोलनाचा इशारा दिला होता. पोलीस बंदोबस्तामुळे आंदोलकांना थेट देशमुख यांच्या घरापर्यंत पोहोचता आले नाही. त्यामुळे संघटनेचे कार्यकर्ते रुग्णवाहिकेत लपून देशमुख यांच्या निवास्थानापर्यंत पोहोचले. रुग्णवाहिकेतून बाहेर पडून त्यांनी घोषणाबाजी केली. यावेळी पोलीस आणि आंदोलकांमध्ये झटापट झाली. त्यामध्ये आंदोलकांनी रक्ताच्या बाटल्या फोडल्याने सहकार मंत्र्यांच्या निवासस्थानाबाहेर रक्ताचा सडा पडला होता. या घटनेमुळे वातावरण काही वेळ तंग झाले होते.
Saturday, November 18, 2017 AT 08:45 PM (IST)
कोथळेच्या नातेवाइकांनाही जबाबासाठी बोलावणार 5सांगली, दि. 15 (प्रतिनिधी) :पोलीस कोठडीतील अनिकेत कोथळे खून प्रकरणातील प्रत्यक्ष साक्षीदार आणि केवळ नशीब बलवत्तर म्हणून क्रूर पोलीस गुन्हेगारांच्या तावडीतून बचावलेला अमोल भंडारे याचा बुधवारी कारागृहात जबाब घेण्यात आला. या प्रकरणी निलंबित करण्यात आलेल्या सातही निलंबित पोलिसांची चौकशी आणि जबाब नोंदविण्याची प्रक्रिया रात्री उशिरापर्यंत सुरू होती. अनिकेत कोथळेच्या नातेवाइकांनाही जबाबासाठी बोलावण्यात आले असून त्यांचा नेमका आक्षेप काय आहे? त्या आक्षेपाचे आणि पोलिसांनी केलेल्या गुन्ह्याचे कनेक्शन आहे का, याची पडताळणी केली जाणार आहे. पोलिसांनी केलेल्या कृत्याची विविध कारणे समोर येत असून ती सर्व कारणे तपासली जाणार असल्याचे सांगण्यात आले. सांगली शहर पोलीस ठाण्यातील कोठडीत झालेल्या अनिकेत कोथळे खून प्रकरणाचा तपास गतीने करण्यासाठी सीआयडीने सांगलीत तळ ठोकला आहे. नजीकच्या पाच जिल्ह्यांमधील सीआयडी पथकांचा यात समावेश असून सध्या गुन्ह्यातील जास्तीत जास्त पुरावे संकलित करण्यावर भर देण्यात येत आहे.
Thursday, November 16, 2017 AT 08:51 PM (IST)
1 2 3 4 5 ...
 
© Copyrights 2010 Dainik Aikya.com - All rights reserved.
of
Powered By: