Dainik Aikya - Published from Satara (Maharashtra,India) Published on,
 
Search Tag:     From Date:     To Date:     Section:    
Total Results: 56
एकाला जन्मठेप तब्बल 34 वर्षांनी निकाल 5नवी दिल्ली, दि. 20 (वृत्तसंस्था) : तत्कालीन पंतप्रधान इंदिरा गांधी यांच्या हत्येनंतर 1984 मध्ये झालेल्या शीखविरोधी दंगलीशी संबंधित प्रकरणात दिल्लीतील पतियाळा हाऊस न्यायालयाने तब्बल 34 वर्षांनी एका दोषीला फाशीची शिक्षा सुनावली. यशपाल सिंग याला हत्येप्रकरणी दोषी ठरवताना फाशीची तर नरेश सहरावत याला जन्मठेपेची शिक्षा न्यायालयाने ठोठावली.   माजी पंतप्रधान इंदिरा गांधी यांच्या हत्येनंतर अनेक शहरांमध्ये काँग्रेसच्या नेत्यांनी व कार्यकर्त्यांनी दंगली भडकवल्या होत्या. त्या दरम्यान दक्षिण दिल्लीतील महिपालपूर परिसरात 1 नोव्हेंबर 1984 रोजी हरदेवसिंग (वय 24) आणि अवतारसिंग (वय 26) या दोन शीख तरुणांची हत्या करण्यात आली होती. गेल्या आठवड्यात न्यायालयाने या प्रकरणातील पक्षकारांची बाजू ऐकून घेऊन निकाल राखून ठेवला होता.  शिक्षेवरील सुनावणीत सरकारी वकील आणि पीडित कुटुंबीयांच्या वकिलांनी दोषींना फाशीची शिक्षा देण्याची मागणी केली होती तर बचाव पक्षाने दयेची विनंती केली होती.
Wednesday, November 21, 2018 AT 08:59 PM (IST)
सीबीआयच्या सहसंचालकाचा सनसनाटी आरोप 5नवी दिल्ली, दि. 19 (वृत्तसंस्था) : सीबीआयमधील दुसर्‍या क्रमांकाचे अधिकारी असलेल्या राकेश अस्थाना यांच्या विरोधातील लाचखोरीच्या प्रकरणाच्या आणि भ्रष्टाचाराच्या चौकशीत राष्ट्रीय सुरक्षा सल्लागार अजित दोवाल यांनी ढवळाढवळ केल्याचा आणि एका केंद्रीय मंत्र्याला कोट्यवधी रुपयांची लाच देण्यात आल्याचा सनसनाटी आरोप सीबीआयचे सहसंचालक मनीषकुमार सिन्हा यांनी सर्वोच्च न्यायालयात याचिकेद्वारे केला आहे. अस्थाना यांच्याविरोधातील चौकशी पथकात असलेले सीबीआयचे सहसंचालक मनीषकुमार सिन्हा यांची बदली नागपूरला करण्यात आली. या निर्णयाला त्यांनी सुप्रीम कोर्टात आव्हान दिले आहे. अस्थानाच्या यांच्या चौकशीत राष्ट्रीय सुरक्षा सल्लागार अजित दोवाल यांनी ढवळाढवळ केल्याचा आरोपही त्यांनी केला आहे. या संदर्भात त्यांनी सरन्यायाधीश रंजन गोगोई यांच्या नेतृत्वाखालील तीन न्यायाधीशांच्या खंडपीठासमोर याचिका दाखल केली आहे. मात्र, या याचिकेवर तातडीने सुनावणी करण्यास सुप्रीम कोर्टाने नकार दिला आहे. एम. के. सिन्हा यांनी सरकारवरही आरोप केले आहेत.
Tuesday, November 20, 2018 AT 09:03 PM (IST)
5श्रीनगर, दि. 18 (वृत्तसंस्था) : जम्मू-काश्मीरच्या शोपियानमध्ये रविवारी पहाटे चकमक होवून त्यात सुरक्षा दलाच्या जवानांनी दोन दहशतवाद्यांना कंठस्नान घातले आहे. दहशतवाद्यांना कंठस्नान घातल्यानंतर तेथून मोठ्या प्रमाणात शस्त्रास्त्र आणि दारूगोळा हस्तगत करण्यात आला आहे. सध्या परिसरात नाकेबंदी करुन शोधमोहीम सुरू आहे. जम्मू-काश्मीर पोलिसांनी दिलेल्या माहितीनुसार,  रविवारी पहाटे शोपियान जिल्ह्यातील जैनापुरा परिसरात दहशतवादी लपल्याची माहिती मिळाल्यानंतर येथे शोधमोहीम राबवण्यात आली. शोधमोहीम सुरू असतानाच दबा धरुन बसलेल्या दहशतवाद्यांनी गोळीबार केला. त्यानंतर दोन्ही बाजूंनी गोळीबाराला सुरूवात झाली आणि दोन दहशतवाद्यांना मारण्यात यश आले. परिसरात अजून दहशतवादी लपून बसले असण्याच्या शक्यतेमुळे शोधमोहीम सुरू आहे. मिळालेल्या प्राथमिक माहितीनुसार, ठार करण्यात आलेल्या दहशतवाद्यांची ओळखही पटली आहे. तत्पूर्वी शनिवारी दुपारी शोपियान जिल्ह्यातच दहशतवाद्यांनी तीन युवकांचे अपहरण करुन एकाची हत्या केली होती आणि अन्य दोघांना सोडून दिले होते.
Monday, November 19, 2018 AT 08:44 PM (IST)
पुन्हा विनासूचना आंदोलन करण्याचा इशारा 5कोची, दि. 16 (वृत्तसंस्था) : केरळमधील प्रसिद्ध शबरीमाला मंदिरात प्रवेश करण्यासाठी महाराष्ट्रातून गेलेल्या सामाजिक कार्यकर्त्या तृप्ती देसाई यांना हिंदुत्ववादी संघटनांनी जोरदार विरोध केल्याने त्यांना या आंदोलनातून माघार घ्यावी लागली. हजारो लोकांनी विमानतळाबाहेर आंदोलन केल्याने तृप्ती देसाई यांना मंदिरात प्रवेश करणे शक्य नसल्याने त्यांनी विमानतळावरूनच पुण्यात परतण्याचा निर्णय घेतला. दरम्यान, आपण आंदोलनावर ठाम असून यापुढे विनासूचना शबरीमाला मंदिरात प्रवेश करण्याचा इशारा त्यांनी दिला आहे. शबरीमाला मंदिराचे दरवाजे आज सायंकाळी 5 वाजता दर्शनासाठी उघडण्यात आले. मासिक पाळी येणार्‍या महिलांना या मंदिरात प्रवेश दिला जात नाही. मात्र, सर्वोच्च न्यायालयाने सर्व महिलांना प्रवेशाचा अधिकार असल्याचा निर्णय नुकताच दिला होता. त्यानुसार अनेक महिलांनी मंदिरात जाण्याचा प्रयत्न केला. मात्र, त्यांना रोखण्यात आले होते. दरम्यान, या प्रकरणी सर्वोच्च न्यायालयात पुनर्विचार याचिका दाखल करण्यात आल्या असून त्यावर पुढील वर्षी 22 जानेवारीला  सुनावणी होणार आहे.
Saturday, November 17, 2018 AT 09:19 PM (IST)
‘इस्रो’च्या मोहिमेत सातारच्या शास्त्रज्ञाचे योगदान 5श्रीहरिकोटा, दि. 14 (वृत्तसंस्था) : भारतीय अंतराळ संशोधन संस्था अर्थात ‘इस्रो’ने ‘जीसॅट-29’ या साडेतीन टन वजनाच्या दळणवळण उपग्रहाचे यशस्वी प्रक्षेपण केले. श्रीहरिकोटा येथील सतीश धवन अंतराळ केंद्रातून ‘जीएसएलव्ही-एमके3-डी2’ या स्वदेशी बनावटीच्या अत्याधुनिक प्रक्षेपकाद्वारे हा उपग्रह पृथ्वीभोवतीच्या कक्षेत सोडण्यात आला. दरम्यान, या मोहिमेत मूळचे सातारचे असलेले शास्त्रज्ञ पंकज दामोदर किल्लेदार यांचा मोलाचा वाटा आहे. दरम्यान, ‘जीसॅट-29’ या आतापर्यंतच्या सर्वात वजनदार भारतीय उपग्रहाचे यशस्वी प्रक्षेपण करून इस्राने स्वदेशी बनावटीचे क्रायोजेनिक इंजिन असलेल्या ‘जीएसएलव्ही-एमके3-डी2’ या प्रक्षेपकाचीही दुसरी यशस्वी चाचणी घेतली आहे. पुढील चार वर्षांत होणार्‍या ‘चांद्रयान-2’ आणि मानवी अंतराळ मोहिमेसाठी ‘इस्रो’च्या शास्त्रज्ञांचे मनोबल उंचावणारी ही घटना आहे. ‘जीसॅट-29’चे वजन 3,423 किलोग्रॅम असून हा उपग्रह जम्मू-काश्मीर आणि ईशान्य भारतातील दळणवळणाच्या विकासासाठी उपयुक्त ठरणार आहे.
Thursday, November 15, 2018 AT 08:44 PM (IST)
1 2 3 4 5 ...
 
© Copyrights 2010 Dainik Aikya.com - All rights reserved.
of
Powered By: